中美尋日於上海展開新一輪談判，令大眾再次關注貿易戰風向。其實喺過往嘅貿易戰入面，美國可以話係「重要角色」之一，除咗上次講起美國逼包括日本在內嘅盟友貨幣升值，令自己出口增加外，美國喺80年代亦向蘇聯發動貿易戰，打擊呢個敵對陣營。不過今時今日，國際形勢已經唔同晒，美國仲可唔可以靠呢招影響中國等主要對手，就靠大家自行判斷喇。

講返美國同蘇聯先，1970年之前，雙方嘅貿易戰主要係聚焦石油同相關設備。去到1979年蘇聯出兵阿富汗，令美蘇關係再次變得緊張。80年代起，美國開始對蘇聯實施經濟制裁，包括喺高端技術、農產品、軍事設備、電子、通訊、化工、機械、自動化設備等領域，禁止同蘇聯進行貿易、實施出口配額及中止投資等，以阻止蘇聯提升技術。另一方面，美國又聯合西歐以及日韓等資本主義國家，對蘇聯實施聯合制裁，最終令一系列嘅制裁措施發揮作用，削弱蘇聯嘅經濟實力。除此之外，美國又誘使蘇聯進行軍備競賽，蘇聯當年投入國防嘅預算高達GDP 40%。多種因素影響下，蘇聯經濟步入衰敗。

美國雖然打贏呢場貿易戰，但亦付出唔少代價，其中包括美國取消咗同蘇聯嘅合同，令美國部分行業利益受損。另一方面，因為美國要求包括西歐國家在內嘅第三方國家禁止或限制同蘇聯嘅貿易，令相關國家利益受損，亦損害咗美國同呢啲國家嘅關係。

時至今日，中國同當年蘇聯嘅情況唔同，中國早已經融入世界經濟體系同科技體系，美國經濟學家薩克斯指出，封殺中國嘅話，無論對美國定係世界都係一個災難。

圖為當年嘅蘇聯，取自網絡。