上個禮拜天水圍發生煙花襲擊事件，造成多人受傷，但其實香港早响1967年已經立法禁止燃放煙花炮仗。根據香港法例第228章《簡易程序治罪條例》，任何人非法燃放煙花炮仗，對任何人造成損害或危險，最高刑罰係罰款500蚊或監禁三個月。至於點解會禁止民間放炮仗？其實係同1967年嘅六七暴動有關。

當年有人利用炮仗入面嘅火藥製造炸彈，結果導致多人傷亡。鑑於煙花、炮仗喺當時市面好常見，所以當局之後修訂法例，嚴禁民間藏有火藥。法例同時規定，如果市民想放煙花同燒炮仗，必須事先向民政事務局申請。不過睇返資料，獲批准嘅情況真係唔多見，2004年元朗廈村鄉太平清醮係少數成功闖關嘅例子，可以响合法情況下燒炮仗。

而政府禁還禁，總會有啲新界鄉村喺每年農曆新年偷偷地慶祝，不時傳出煙花同炮仗聲。正所謂有需求就有供給，唔少不法商人會鋌而走險販賣煙花炮仗。根據香港法例第295章《危險品條例》，非法管有煙花炮仗嘅刑罰更加高，最高罰款25000蚊或監禁六個月，所以大家千祈唔好以身試法。

原圖嚟自網絡。