早兩日滙豐控股CEO范寧宣佈辭職，接任人亦未決定，消息相當突然，搞到股價即日下跌。講開滙豐大班，呢個職位嘅人選喺回歸前對香港社會具有舉足輕重嘅影響力。當時唔少滙豐大班會兼任馬會主席同行政局成員，好似前大班浦偉士同葛萊咁都做過行政局成員。直到前滙豐銀行亞太區主席鄭海泉1997年之後無出任行會成員，先令呢個「慣例」畫上句號。昔日嘅滙豐大班唔單止對香港政治、經濟同社會有住舉足輕重嘅影響力，更係歷任港督嘅顧問，意見甚至可以直達英國政府同英倫銀行。

講開滙豐大班，就不得不提任期最長、被稱為「神級大班」嘅浦偉士。由1987年起，佢透過分階段收購英國米特蘭銀行股權，將滙豐變身做英國註冊嘅滙豐控股，帶領業務衝出亞洲。之後，浦偉士喺回歸前卸咗滙豐嘅半央行角色，交俾新成立嘅金管局接管，令滙豐逐漸淡出本港政圈。今時今日，滙豐大班嘅言行依然有一定影響力，不過就僅限於金融市場上。

以往，滙豐大班退休之後都有個不成文規定，就係卸任後一係返老家一係長居海外，唔會長駐香港，呢個規定被前主席施德論率先打破。施德論於九十年代中後期擔任大班，未到60歲就提早退休，佢積極擔任公職並以香港爲家，之後去到前主席鄭海泉，佢係土生土長嘅香港人，難以要求佢哋長期離開香港，呢個傳統自然漸漸消失。

原圖為浦偉士同滙豐銀行，取自網絡。