尋日同大家講咗西漢廢帝劉賀只係做咗27日皇帝就被廢黜，最後被貶返封地做海昏侯。去到近年，隨住海昏侯墓被發現，考古學家發現劉賀嘅真實形象號可能同《漢書》所載唔同。而講到海昏侯墓嘅發現，其實都係一段傳奇故事，因為佢嘅主墓差小小就被盜墓者掘到，班賊仔同無價之寶嘅距離，只係差5cm。

話說喺2011年3月，江西省文物考古研究所嘅研究員收到電話，話喺南昌觀西村度發現一個盜洞，更有村民曾經見過幾個懷疑係盜墓賊嘅人喺附近出沒。研究員於是即刻前往當地勘測，就咁發現咗海昏侯墓。其實海昏侯墓並唔係首次被盜，考古人員發現有嘅五代時期嘅盜洞，至於去到21世紀，其中一個通往主椁室、深14m嘅盜洞離陪葬品只係差5cm，因為被多層木頭保護，所以盜墓賊並未得手，認真驚險。

據史料記載，東晉時期江西曾發生一場大地震，而喺318年豫章郡亦曾有過大地震，令海昏侯墓墓室坍塌，被地下水淹沒，亦為海昏侯墓提供咗一重保護屏障。喺當時盜墓技術唔成熟嘅年代，咁樣嘅天然屏障令海昏侯墓得以喺盜墓者手上倖免於難。不過，海昏侯墓嘅主墓雖得以保存，但隔離嘅侯夫人墓就無咁好彩喇，早就被洗劫一空。

圖為海昏侯墓出土嘅金幣，原圖嚟自網絡。