相信史友們都聽過二十世紀初鐵達尼號沉沒嘅事，呢艘當時世界最大客運輪船响首航沉沒。而响1972年1月9日，當時全世界最大嘅郵輪伊利莎伯皇后號發生大火，經過一百小時後郵輪焚毀，而呢場大火仲係响香港發生。
伊利莎白皇后號响1938年建成下水，二戰時曾經係運兵船，戰後就响大西洋航行，响上世紀三十至七十年代初世界上最大嘅郵輪。响1970年，香港「船王」董浩雲就斥資320萬美元購入該郵輪，據講早响四十年代董浩雲參觀完伊利莎白皇后號就已經想將艘郵輪收歸旗下，最終得償所願。1971年，伊莉莎伯皇后號就抵達香港，並停泊响青衣對出海面進行裝修。
當時董浩雲嘅構想，就係將呢艘郵輪改裝成一所教育用途嘅流動大學，並命名為「海上學府」。可惜，响1972年1月9日，呢艘郵輪突然起火，火勢愈嚟愈猛烈，消防處更發出災難級火災災情警報，大火燒咗101小時之後被撲熄，全船焚毀沉沒。
事後警方調查發現，呢場大火係有人縱火所致。而董浩雲對於「海上學府」焚毀沉沒，就大嘆「欲哭無淚」、「悲憤莫名」。