阿史呢排睇新聞，不時見到有人將近期嘅示威活動同「顏色革命」相提並論，阿史今日就講解吓「顏色革命」嘅歷史，等大家溫故知新。「顏色革命」最初係指21世紀初喺前蘇聯同中東西亞北非地區發生，以顏色或者花朵命名嘅政權更迭活動，最出名嘅例子包括2003年格魯吉亞「玫瑰革命」、2004年烏克蘭「橙色革命」、2005年吉爾吉斯斯坦「鬱金香革命」等。

2003年，當時格魯吉亞有人不滿總統謝瓦爾德納澤，揚言要佢落台。當時反對派領袖現身時，都會拎支紅玫瑰，最後大批拎住紅玫瑰嘅示威者佔領國會，令總統黯然下台。反對派領袖薩卡什維利2004年透過「顏色革命」上台，成為格魯吉亞總統，經連任後掌權達9年。不過佢於2014年被最高檢察院起訴，指控佢鎮壓2007年11月嘅示威、關閉批評政府嘅電視台，以及處理他人財產等過程中，涉及越權等罪行。

至於烏克蘭於2004年爆發「橙色革命」之前，正值總統大選，大熱兩強包括親俄嘅亞努科維奇同親美嘅尤先科。尤先科本黎喺民調中跑出，但點知亞努科維奇成為其贏家，搞到大批民眾上街抗議。而尤先科喺選舉中所用嘅橙色，因而成為運動嘅象徵顏色，當時有成百萬人表達不滿，出現靜坐、抗議等場面。後嚟最高法院宣布大選無效，尤先科喺重選中勝出，透過「橙色革命」掌權。

不過「橙色革命」並無解決烏克蘭嘅困境，陸續初選唔少管治問題，好似尤先科捲入貪污醜聞，受到大眾指責，而「橙色革命」領袖之一、被譽為「美女總理」嘅季莫申科，上任總理唔夠1年，就因濫權而下台兼坐監，任內烏克蘭經濟增長亦較尤先科上任前嘅12.1%，大幅下跌至3.8%。

至於2010年阿拉伯之春橫掃中東，埃及亦爆發大規模示威，反對埃及「最後法老」總統穆巴拉克。穆巴拉克落台之後，穆爾西成為當地首位民選總統，不過穆爾西忽略經濟政策，令通貨急劇膨脹，加上用人不當，令支持度下滑。佢執政一年之後，被軍方領導賽西趕落台及監禁，最後穆爾西今年6月病逝獄中，令當地民主進程並無任何進展。

圖為烏克蘭「橙色革命」，取自網絡。