雍正年間，有唔少重臣受皇帝提攜、重用，好似之前講過嘅將領年羹堯咁。不過，由於各種原因，呢啲重臣最後幾乎都無乜好下場，今日阿史講嘅田文鏡，雖然得雍正賞識，但死咗之後竟然被雍正個仔乾隆夷平咗個墳墓？究竟犯咗咩錯呢佢？

據《清史稿》載，田文鏡喺康熙年間已經開始做官，不過一直都係做啲小官，無乜大作為。直到雍正登基，遇到山西發生災害，地方官隱瞞不報，而田文鏡就好老實咁同雍正講出山西災情，雍正欣賞佢敢直言，於是派佢主理賑災。田文鏡果然不負所托，之後調任河南之後又剔除吏治宿弊，甚得雍正重用。

1732年田文鏡病逝，雍正命河南設立專祠供奉田文鏡。之後乾隆繼位，有人上奏田文鏡嘅手下王士俊剝削民脂民膏，搞到百姓怨聲載道。而之前田文鏡曾隱瞞河南災情不報，令百姓流離失所，百姓都唔肯將田文鏡供入河南賢良祠。唔單止咁，田文鏡墓地仲被乾隆夷平，據講係田文鏡墓嘅門牆佔咗御道，乾隆前往清西陵時見到，就下令整頓。

圖為田文鏡劇照，原圖嚟自網絡。