唔知大家打邊爐嗰陣鍾唔鍾意叫羊肉嘅呢？阿史有個fd超鍾意食羊肉，打邊爐簡直無羊不歡，但原嚟羊肉呢個食法同元世祖忽必烈有關？

據說忽必烈有次帶兵南下打仗嗰陣，特意命廚師燒羊肉嚟犒勞士兵，點知當廚師准備烤羊嘅時候，探子報話敵人嚟緊，真係要食就趁早。不過要烤熟成隻羊，無返個零兩個鐘都唔成事，偏偏忽必烈又催廚師，堅持食咗羊先上戰場。就喺呢個緊張關頭，有個廚師急中生智，將羊肉切成薄片，擺入熱水度淥熟就即刻撈入碗度，撒啲鹽花就呈上俾忽必烈。忽必烈食到讚不絕口，賜名「涮羊肉」，從此羊肉就成為火鍋界嘅新寵。

忽必烈唔單止識打仗，仲好識食，自佢定都北京之後，夏天要飲新鮮牛、羊奶不易，奶類又難保存。忽必烈於是諗到喺奶度加入冰塊，延長奶類嘅保鮮時間，就咁意外地發明咗「奶冰」，佢仲加入生果等配料，認真識食。傳聞話意大利旅行家馬可·波羅就係因為試過呢種奶冰，將款手藝帶返去歐洲，之後再經過改良，先出現咗宜家嘅消暑聖品——雪糕。

圖為忽必烈畫像同涮羊肉，原圖嚟自網絡。