喺第二次世界大戰末期，日本起用「神風特攻隊」，由飛行員駕駛裝滿彈藥嘅飛機執行自殺式攻擊，成為二戰史上黑暗一頁。部隊當時係由日本海軍中將大西瀧治郎提出並組織，並命名為「神風特攻隊」，希望好似13世紀靠「神風」擊敗元軍咁，令日本扭轉劣勢。阿史今次就介紹吓元世祖忽必烈同日本嘅戰爭歷史，同埋到底同「神風」有咩關係。

「神風」嘅歷史，係同1274年、1281年元世祖忽必烈先後兩次派兵出征日本有關，當時元兵都失敗收場。早於1270年，忽必烈第5度派使節去到日本，警告日本如果唔向蒙古朝貢，就會出兵，被日本一口拒絕。忽必烈食完檸檬梗係好嬲，於是下令準備軍隊、船隻、糧餉，向日本開戰。

喺1274年，忽必烈命令風州經略使忻都同高麗軍民總管洪茶立帶領900艘戰船，以及1.5萬名士兵遠征日本。開戰初期，元軍取得大勝，日軍被迫撤退。當時元軍無喺陸上紮營，夜晚都會返船過夜，點知有一晚颱風同暴風雨來襲，元軍超過200艘戰船沉沒，忻都憂慮日軍突襲，於是下令撤退。據記載，呢一役元軍有1.35萬人死亡。去到第二朝，日軍見到元軍走人，於是展開大規模拜神活動，並稱呢個風為「神風」。

忽必烈對戰事失利非常震驚，再派使節去日本要求納貢，不過又食多次檸檬，使節仲連命仔都保唔住。喺1281年，忽必烈派出10萬大軍再次攻日，雙方展開激戰，打足2個月。呢個時候，日本人口中嘅所謂「神風」再次出現，令大批元軍死亡、慘敗。

日本擊退元軍係咪全靠「神風」相助？近年有另一個講法，或者可作參考。有美國考古學家研究由海底打撈上嚟嘅蒙古戰艦殘骸，發現戰艦龍骨質素低劣，而且龍骨上面嘅鉚釘非常密集，證明戰船嘅板材曾經多次使用，相信艦隻質素差亦係當時元軍戰敗嘅原因之一。

圖為蒙古征日圖，取自網絡。