1883年，美國最大嘅工人組織勞工騎士團喺懷俄明州石泉礦區罷工，華工拒絕參與，礦場乘機請咗更多華人嚟代替罷工嘅白人。呢啲白人工人喺1885年今日帶住槍包圍石泉鎮唐人街，事件導致28個華工被殺、15人重傷，財產損失達14.7萬美元，史稱石泉城大屠殺。

將時間線推前返十幾年，其實自從1865年美國中央太平洋鐵路公司招收第一批中國勞工之後，美國人發現華工特別捱得苦，人工低又聽話。於是當地越嚟越多僱主聘用華工，華工移民去美國嘅數字亦激增。唔少美國人認為中國人令到佢哋飯碗不保，排華情況日益嚴重。1882年美國國會更通過《排華法案》，令排華情緒更加高漲。

石泉城大屠殺發生之後，警方隨即逮捕16個白人疑犯，但因種族歧視同華人唔可以出庭作證，16人全部被無罪釋放。清政府欽差大臣鄭藻如聞訊即刻向美國國務卿發出照會，要求懲治犯人同賠償受害者財產損失。直到1887年，美國國會先肯應承中方提出嘅要求，悉數賠款。

圖為石泉城大屠殺畫，原圖嚟自網絡。