古代皇帝後宮佳麗三千，佳麗想要得寵難，想要專寵就更加難上加難，不過明朝嘅萬貴妃就做得到喇。萬貴妃唔算生得好靚，又大過皇帝成十九年，但偏偏明憲宗朱見深對佢盛寵不衰，究竟萬貴妃有咩過人之處？

萬貴妃原名萬貞兒，據《明史》所載，佢年僅4歲就入宮成為孫太后宮女，大咗之後就去咗當時仲喺太子嘅朱見深身邊做侍女，可以話係湊大朱見深嘅保姆。朱見深即位嗰陣，萬貞兒已經30幾歲，但都無損朱見深對萬貞兒嘅寵愛。好快，萬貞兒有孕，生咗個皇子，朱見深開心到封萬貞兒做貴妃。可惜，個皇子早夭，萬貞兒亦都無再懷孕。經歷喪子之痛，萬貞兒恃住朱見深嘅寵愛，對後宮其他懷孕嬪妃、皇子落毒手，可以話喺宮中打橫行。

至於點解朱見深咁鍾意萬貞兒？有人推測朱見深可能有戀母情結，萬貞兒由細陪到佢大，感情仲親厚過親生阿媽，朱見深自然對佢依賴甚深。其次，萬貞兒係個相當有心計嘅女人，佢了解朱見深，知道點樣討好同迎合呢位皇帝。不過盛寵還盛寵，依然敵不過光陰匆匆，萬貞兒最後因病暴斃，諡號「恭肅端慎榮靖皇貴妃」，朱見深更傷心到唔上早朝7日。

劇照嚟自網絡。