今朝深水埗地鐵站有女警開槍制服鎅刀男，打中對方嘅腹部，成為香港第一位於執勤時開槍嘅女警。

之前提過，香港第一次招聘女警嘅時候食白果，到第二次招聘時，先至誕生首位女警、副督察高健美（又名許錦濤）。去到1950年8月第三次招聘，情況大大不同，有成千人應徵，最後警隊只挑選咗十位女精英進入黃竹坑警察學校受訓，可以話係難選過港姐。根據資料，當年女警執勤唔需要配槍，所以槍械訓練只有左輪手槍嘅使用理論，並無實彈射擊。

而香港首位陀槍師姐正正就喺依十位受訓嘅女警當中，佢就係編號排第十、被稱為「十姐」嘅林靄思。1953年佢要去布袋澳追查謀殺案，有一定危險，所以警方容許十姐帶槍。十姐後嚟回憶，當時上司即刻叫佢喺山頭練下，以免見到兇徒都唔識開槍。雖然十姐嘅佩槍於當日行動後即刻交還，但已經令佢成為一日嘅陀槍師姐。

直至九十年代，警隊推行女警佩槍嘅實驗計劃，於在職女警當中挑選，並接受訓練，培養第一代陀槍師姐。去到1995年起，全部新招募嘅女警必須接受槍械訓練，並需於執勤時佩槍，正式展開陀槍師姐年代。不過於今日之前，全部女警都係陀住「善良的槍」。

圖片嚟自網絡。