講起廉政公署，可能會諗起「大老虎」總警司葛柏、5億探長呂樂等名字，相對而言，較少人會提起韓德呢個人。原來韓德當年大爆呂樂有五億身家，加埋電影效應，令呂樂「五億探長」嘅稱號不逕而走。講返韓德，佢係香港50年代至70年代嘅外籍警司，佢曾經有句「金句」，話相信大部份香港警察都貪污，收賄更加係生活嘅其中一環，正如朝早起身、夜晚瞓覺咁自然。

話說1952年嘅時候，韓德喺英國見到香港警察嘅招聘廣告，當時佢希望接觸新事物，於是就嚟咗香港做警察，起初佢都好正直，被派到尖沙咀水警基地負責海上巡邏，當時有人走私物資返大陸，但拒絕貪污、揸正嚟做，開始被其他同袍疏遠，最後仲被人調走埋。

不過人工太低令韓德一家生活困苦，佢唔肯同流合污嘅堅持最終都敵唔過金錢嘅誘惑。後嚟韓德被調去旺角、深水埗，成為偵緝主任，每月「收規」約3萬幾港元，之後做咗灣仔區警司，更每月受賄約13萬港元。憑住不義之財，令佢從此過上奢華生活。

去到70年代初，韓德嘅奢華生活引起反貪部注意，就算葛柏出口叫佢收斂下，韓德都無停手，可想而知佢有幾貪。直至1793年，葛柏離港，港府開始打擊貪污。韓德被指喺1971年5月至1973年2月期間，洗咗超過28萬元，遠超過佢嘅薪金，之後被判罪成。韓德為咗提早甩身，選擇同警方合作轉做污點證人，指證葛柏同其他貪污警員，最終獲港英政府特赦，提早釋放。貪字，始終都無好下場。