尋晚係2019年香港小姐競選決賽，黃嘉雯奪得冠軍，王菲（唔係歌手呀）奪得亞軍兼奪最上鏡小姐，而季軍就係古佩玲。贏到冠軍固然開心，但贏唔到都唔使灰心，連《後生仔傾吓偈》班主持都話港姐亞軍嘅發展好過冠軍，究竟係咪？阿史諗起以前有部分港姐亞軍兼最上鏡小姐雖然輸個馬鼻，不過人生道路一樣走得好亮麗，好似影后張曼玉同電眼美人李美鳳咁，一個喺影視圈發光發熱，一個嫁到好老公，絕對唔比其他佳麗輸蝕。

張曼玉參選1983年香港小姐之後，同著名演員梁朝偉拍過電視劇《新紮師兄》，而電影作品方面，經典作品包括王家衛嘅《旺角卡門》、《流金歲月》等，佢憑1990年嘅《不脫襪的人》奪得首個香港影后寶座，之後再憑《阮玲玉》、《甜蜜蜜》、《宋家皇朝》及《花樣年華》共五度封后，紀錄至今無人能破。另外佢多次贏得金馬影后，仲於柏林同康城封后，演技備受肯定。

至於有「電眼美人」之稱嘅李美鳳，當年亦失落冠軍寶座。李美鳳1987年參選港姐，係大熱門嚟㗎，但最終輸咗俾楊寶玲，拎咗亞軍同最上鏡小姐獎項，佢入行之後得到唔少機會，拍過電視劇《成吉思汗》，電影《畫中仙》、《捕風漢子》同《精裝追女仔2》等等，不過多數都係配角，發展平平。李美鳳响1990年因為拍攝電影《笑星撞地球》嘅時候，同林敏驄拍拖，當年有報道仲話二人已經結婚，不過婚姻維持咗5年就結束。之後李美鳳喺1996年嫁咗俾台灣富商鄭翔中，搞咗個空中婚禮，喺當時嚟講都咪話唔轟動。佢其後定居台灣，仲生咗對龍鳳胎，生活美滿。

唔講唔知，原來「蘭子」陳淑蘭亦都係港姐亞軍兼奪最上鏡小姐嚟！佢1988年參選，嗰屆冠軍係有「大美人」之稱嘅李嘉欣。咦？咁即係當年啲評判覺得李嘉欣無陳淑蘭咁上鏡？大家又點睇？

原圖取自網絡。