明末有三大懸案，分別係「梃擊案」、「紅丸案」同「移宮案」，相信史友讀書時都會聽過，阿史今日就介紹吓「梃擊案」先。「梃擊案」發生响萬曆四十三年（1615年）五月初四嘅夜晚，一個薊州男子張差揸住支木棍入宮，前往太子朱常洛居住嘅慈慶宮。途中只有兩位年老嘅宦官守門口，張差輕鬆將佢哋擊倒，之後就長驅直進，走入慈慶宮正殿。咁啱朱常洛唔喺度，張差先至被發現，一班侍衛趕到將佢制伏。太子個竇保安都咁差嘅，到底搞邊科？

經過多番審訊，張差供出鄭貴妃手下嘅太監龐保、劉成，於是當時嘅大臣都認定鄭貴妃為咗幫個仔朱常洵爭太子之位，而背後指示人做嘢。事件引起軒然大波，但鄭貴妃就堅決否認，又向朱常洛下跪，神宗皇帝最後決定將張差、龐保同劉成處決了事，從此呢件案就變成懸案喇。萬曆四十八年（1620年），神宗逝世，朱常洛繼位，是為明光宗，但點知喺同年就因為另一單懸案「紅丸案」逝世。當中有咩景轟？下回再續。

圖為劇照，取自網絡。