軍閥花名零舍多

北洋軍閥時期，唔少將領都擁有特別嘅綽號，好似「北洋三傑」咁：王士珍為龍、段祺瑞係虎，而馮國璋係狗。點解係龍虎狗？話說三國時期諸葛家三兄弟被人稱為龍虎狗：諸葛亮被劉備重用，做咗蜀漢嘅丞相，係龍；諸葛瑾報效東吳，做咗孫權嘅謀士，係虎；而諸葛誕投奔咗曹丕，做咗曹魏嘅大將軍，係狗。「北洋三傑」其實就係好似諸葛三兄弟咁，根據才能、地位嚟排出龍、虎、狗嘅。

除咗同動物有關嘅嘅綽號之外，段祺瑞同馮國璋仲有另外一個花名。段祺瑞又叫歪鼻將軍，皆因佢大怒之下，個鼻就會向左歪斜，需要按摩先可以復原。而馮國璋又有糊塗將軍之稱，因為佢有時做嘢都幾懵吓，自己做過嘅決定都會唔記得。

仲有辮子將軍張勳同笑虎將軍孫傳芳，張勳喺民國成立之後仍然忠於清朝，堅持中國復辟帝制，自己唔剪辮不突止，仲禁止手下剪辮，辮子將軍之名非佢莫屬。至於孫傳芳成日笑面迎人，但暗地裡無人知佢諗緊乜，於是被人喺背後叫佢「笑面虎」。