阿史上次講「顏色革命」嘅時候，提起2004年烏克蘭爆發「橙色革命」，最近就有人喺社區播放一套電影《凜冬烈火：烏克蘭為自由而戰》，講述烏克蘭喺2014年爆發嘅街頭示威，最終點樣推翻當時嘅總統亞努科維奇。阿史今次就講多少少於橙色革命之後，烏克蘭呢段時間到底發生咩事。

2004年烏克蘭舉行總統大選，最初親俄嘅總統候選人亞努科維奇勝出，之後爆發「橙色革命」，經歷連串示威同重選之後，親美嘅尤先科擊敗咗亞努科維奇，當選總統。尤先科執政5年間，烏克蘭經濟惡化、通脹嚴重，導致佢嘅支持度大幅下降，2010年總統大選得票只有5.45%，創下連任最低得票率紀錄，而贏家就係2004年輸咗、嚟個大翻身嘅亞努科維奇。

到咗2013年，亞努科維奇決定唔簽署《烏克蘭歐盟聯繫協議》，11月底觸發大批民眾上街示威抗議，反對政府唔簽《協議》、支持同歐洲一體化、要求亞努科維奇下台。示威人數急速上升，唔使一個禮拜就突破10萬人，並開始由首都基輔蔓延到其他城市。示威者之後開始變得暴力同激進，向警方掟石、汽油彈等等，警方亦以催淚彈、水炮、閃光彈等還擊。後來仲有身份不明嘅第三方槍手向示威者同警察開槍，令局勢進一步升溫。呢次示威維持咗93日，造成123人死亡、超過2000人受傷，死傷者包括示威者、警察同士兵。2014年2月尾，烏克蘭國會通過將亞努科維奇革職，亞努科維奇之後流亡俄羅斯，同年5月親美嘅波羅申科以壓倒性姿態當選總統。

波羅申科當時曾經承諾過，會結束同俄羅斯之間嘅頓巴斯戰爭，以及喺西方夥伴支持下恢復烏克蘭經濟。但事實係，至今頓巴斯戰爭仍未結束，烏克蘭又經歷克里米亞被俄羅斯吞併，以及經濟進一步惡化等，局勢未有起色。受連串亂局影響，烏克蘭嘅GDP由2014年嘅1335億美元，大減至2015年嘅910億美元，而人均收入亦由2014年嘅3560美元，下跌至2650美元，超過500萬人失業。而自由狀況方面，烏克蘭「全球自由指數」嘅排名亦由2016年（指數反映兩年前狀況）顯示嘅第111位，跌到2018年（指數反映兩年前狀況）數據顯示嘅第118位。供大家參考，香港於同一年嘅指數排名為全球第三。

喺2014年示威活動完結之後，烏克蘭索菲亞社會研究中心嘅民調結果顯示，55.4%嘅受訪者認為呢場示威無解決到任何問題，國家發展需要穩定，25%受訪者認為無實現到目標。今年當選烏克蘭總統嘅喜劇演員澤倫斯基，競選嘅時候就直斥波羅申科無履行當年嘅選舉承諾，最終澤倫斯基擊敗波羅申科，以政治素人嘅身份當選總統。

圖片為示威後嘅基輔獨立廣場，取自網絡。