編寫《資治通鑑》嘅北宋著名歷史學家、政治家司馬光，一生受人敬仰，佢喺元祐元年（1086年）逝世之後，獲朝廷追封為太師、溫國公，謚號文正，並賜碑「忠清粹德」，有成千上萬嘅民眾去佢屋企吊唁，又買佢嘅畫像返屋企供奉。司馬光份人出名勤奮、清廉、節儉，又不貪圖回報，就連朋友出埋錢，諗住買個婢女過佢，都被拒絕。

嘉祐八年（1063年），朝廷曾經賞賜價值百萬錢嘅珍品同絲綢俾司馬光，但佢就先後三次上書謝絕賞賜，提到國家內憂外患，各地經濟困難，唔應該繼續呢啲「重獎政策」。但朝廷無批准，於是佢就賣晒呢啲珍品，將啲錢作為辦公經費之用。

清廉嘅司馬光响夫人病逝嘅時候，連安葬費都負擔唔起，最後就將屋企三頃薄田抵押出去，先至夠錢買棺木。後嚟司馬光年老體弱嘅時候，朋友劉賢良諗住出五十萬錢，買個婢女返嚟照顧司馬光，但都遭到婉拒。司馬光話自己幾十年嚟都唔敢成日食肉、著衫唔敢用絲綢，又點敢使喚一個用唔少錢買返嚟嘅婢女呢？

司馬光喺《訓儉示康》援引「由儉入奢易，由奢入儉難」呢句說話，向過繼返嚟嘅仔司馬康講述節儉嘅智慧，而佢自己亦都以身作則，一生過住純樸嘅生活。

圖為司馬光畫像，取自網絡。