大家仲記唔記得自己最初學英文嗰陣係點樣標示讀音嘅呢？應該唔少人同阿史一樣，遇到唔識讀嘅生字，都會用讀音相似嘅中文字標注。原嚟清朝人學英文嘅方法都同我哋差唔多，早幾年有個網友展示咗份「清朝英語教材」，上面除咗有簡單英文句式、中文翻譯之外，仲有中文注音添，依家望返都幾得意吓。

份英文教材大概有40至50頁，由左向右翻，前幾頁仲寫住「咸豐十年（1860年）」。教材裡面嘅「英話註釋目錄」將呢本書分做地理門、君臣門、師友門、宮署門同五金門等。書嘅其中一頁有12格，每格裡面都有中文翻譯、英文原句同用漢字標注嘅讀音。例如「To do with my friend」嘅讀音係「土，度，回夫，買以，勿倫脫」，而「Tomorrow I give you answer」就係「拖馬六，唵以，及夫，尤，唵五史為」。阿史試過用普通話讀出嚟，認真唔係好聽得出原先嘅英文發音，不過如果真係咸豐年代嘅官話讀音，可能就要結合啲方言先還原到原本中文發音。

有專家指出，睇返本書嘅印刷、字體同內容，呢份教材應該係真嘅，但因為未睇到實物，無法推斷具體年代。如果呢本書係善本，咁就好有研究價值喇。

原圖嚟自網絡。