女校喺現代嚟講好常見，唔少女校更加係作育英雌嘅基地。不過喺以前嘅社會，女仔讀書嘅機會本嚟就少，更加唔好話設立女校。咁究竟香港第一間官立女子書院——庇理羅士女子中學又係點樣誕生嘅呢？

早喺1907年，清朝政府已經頒佈咗《欽定女子師範學堂章程》，准許各地創辦初級女子師範學堂。民國以後，全國各地亦陸續開設獨立嘅女子師範院校。至於喺當時嘅香港，男女子嘅教育亦基本分開，香港嘅女子教育首先由教會發起，例如美南浸信會、聖公會。所以喺1890年之前，女仔要讀書就唯有去教會開辦嘅學校。喺傳統思想影響下，當時好多人都認為女仔學英文無用，只係徒增女仔成為外籍人士妾侍嘅機會。

不過，當時督學嘅外籍政府官員歐德理就唔係咁諗，佢向立法會同政府積極爭取女性平等接受英文教育嘅機會。喺1890年，政府終於成立第一間中央女子書院，猶太富商庇理羅士隨後捐出25000蚊，喺中環荷李活道中央書院原址興建三層高嘅新校舍，3年後更名為庇理羅士女校。呢間具有100幾年歷史嘅女校，曾喺1941年因第二次世界大戰爆發而停學，改成臨時救傷中心。二戰結束之後，庇理羅士女子中學喺1945年重新開學，但校舍就被嚴重摧毀，於是由般咸道嘅臨時校舍搬到醫院道，再轉去香島道，直至1965年，終於喺北角天后廟道安定落嚟。

圖為1900年代嘅庇理羅士女校同庇理羅士，原圖嚟自庇理羅士女子中學網頁。