上次講起清廷喺1840年代初嘅第一次鴉片戰爭節節敗退之後，喺1842年8月同英國議和，並由清廷代表兼欽差大臣耆英、伊里布同英國代表砵甸乍（又譯璞鼎查）簽署《南京條約》，結束戰事。《南京條約》嘅內容包括割讓香港島；開放廣州、福州、廈門、寧波、上海五個通商港口；賠償2100萬元等。當時有份簽署《南京條約》嘅砵甸乍，後來就成為香港第一任總督，但佢原來當時受到唔少英商質疑？

喺1843年6月26日，《南京條約》完成換文之後，砵甸乍就喺香港宣誓就任香港第一任總督，並宣布香港成為英國嘅殖民地，受英國政府殖民地部管轄。喺佢管治香港期間，治安非常差，曾經實施宵禁，禁止華人夜晚出街。除咗治安問題，佢對點樣改善香港生活條件、環境衛生亦顯得束手無策。根據記載，喺1843年5月至11月期間，香港瘟疫盛行，喺大約1500名英軍當中，就有24%人死亡，至於其他約400位於香港居住嘅外國人，當中就有一成人死亡。同時，香港附近海面海盜亦非常猖獗，阻礙貿易運輸，於是啲香港英商走去同英國政府告狀，指責砵甸乍治港無方，甚至主張放棄香港。

圖為砵甸乍，取自網絡。