聽日就係建國70週年，今日新聞播出一班國家領導人喺天安門廣場出席烈士紀念日儀式嘅畫面，不如就趁呢個機會介紹吓呢個紀念日嘅由來喇。其實烈士紀念日嘅歷史唔算好耐，喺2004年開始有人提議，要好似其他國家咁設立烈士紀念日，2005年政府部門展開相關研究工作。到咗2014年8月23日，國務院向全國人大常委會提交《關於設立烈士紀念日的決定（草案）的議案》，並且喺31日表決通過，正式將烈士紀念日訂喺每年嘅9月30日，並舉行紀念活動。至於點解係9月30日，其實係同人民英雄紀念碑有關嘅。

話說喺1949年9月尾舉行嘅中國人民政治協商會議第一屆全體會議上，周恩來總理提出喺天安門廣場建立人民英雄紀念碑，建議獲得一致通過。喺30日會議閉幕之後，全體代表出席人民英雄紀念碑奠基典禮。由於立碑係為咗銘記英烈、傳承英雄精神，於是2014年全國人大常委會就通過將9月30日訂為烈士紀念日喇。另一方面，9月30日同10月1日國慶前後相接，亦體現飲水思源嘅道理。

原圖嚟自網絡。