新學期唔經唔覺已經過咗一個月，睇住啲親戚、老友嘅小朋友又要開始上各種補習班、興趣班，睇到都戥佢哋辛苦。清朝皇帝光緒同宜家好多小朋友一樣，除咗讀書之外，仲要學多幾種唔同技能，例如鋼琴、外語咁。而光緒嘅私人補習老師，就係慈禧太后身邊嘅最得寵嘅女官——裕德齡郡主。

裕德齡係中法混血兒，自細跟住貴族外交官父親駐日、法長達六年，精通多國語言。回國後，裕德齡經慶親王介紹入宮俾慈禧，跟住做咗慈禧嘅御用翻譯。裕德齡除咗做翻譯之外，亦要兼任光緒嘅私人英文老師。光緒每日跟住裕德齡學一個鐘英文，成績都唔錯，可以閱讀同默寫短篇英文故事，英文書法更加寫得極佳，裕德齡都忍唔住讚佢「天資穎悟，記憶力絕強」。只不過，可能平時缺乏實踐，光緒嘅英文發音就麻麻地，但呢個教學成果已經令慈禧好欣慰，搞到當時就嚟70歲嘅佢都話要學埋一份。裕德齡梗係照教喇，可惜歲月不饒人，慈禧年紀大咗，學習能力始終無後生仔咁好，只係學咗兩堂就肥佬唔學。

除咗英文，裕德齡嘅著作《清宮二年記》記載，光緒其實都好有音樂天份，咩樂器都一學就識，因為光緒好鍾意鋼琴，所以成日叫裕德齡教佢。光緒有時會同裕德齡傾到西方文明，仲會同裕德齡講吓自己嘅困難同痛苦，兩師生嘅關係都算唔錯。

圖為原圖嚟自網絡。