前排美國有人舉報總統特朗普向烏克蘭總統澤連斯基施壓，話佢要求調查美國前副總統、2020年民主黨總統熱門候選人拜登同埋仔仔亨特。喺眾議院佔大多數嘅議席嘅民主黨認為，特朗普咁樣係冏其他國家干預美國大選，提出對佢展開彈劾程序。阿史今日就介紹吓美國總統被彈劾嘅歷史。

喺美國，彈劾總統係需要先由眾議院司法委員會進行調查，之後交由眾議院大會表決，得到過半眾議員支持嘅話，就會交到參議院審訊。審訊過程由最高法院首席大法官督導，並由參議員擔任陪審員，假如有超過三分之二參議員認為罪名成立，就會正式通過彈劾，罷免總統。

查返資料，美國歷史上未曾有總統因被彈劾而下台，但針對第17任總統詹森（Andrew Johnson）同第42任總統克林頓嘅彈劾程序，曾經响眾議院通過，但喺參議院遭到否決，避過下台。其中，詹森僅僅以一票之差，被參議院否決彈劾。話說詹森1865年以副總統身份，接替遇刺身亡嘅林肯出任總統，佢上任之後馬上赦免南方叛亂份子，又對南方奴隸主採取較為寬鬆嘅「南方重建」政策，令黑人再次受到剝奪、再次成為奴隸。詹森嘅做法引起共和黨不滿，國會另行通過「南方重建」法案，又通過一系列政策限制總統權力。1868年，美國國會發起彈劾詹森，最終雖然只差一票先至通過，但就令詹森聲望跌至谷底。

相隔130年之後，美國國會再次審議總統彈劾案，主角係克林頓。佢同白宮見習生萊溫斯基發生性醜聞，令外界嘩然。因為克林頓1998年初曾經宣誓作供，否認有出軌行為，其後萊溫斯基公開錄音令克林頓改口承認。1998年底，克林頓以涉嫌作假證供、妨礙司法公正罪名遭到彈劾。

除咗詹森同克林頓，另一位前總統尼克遜响70年代亦曾經喺「水門事件」中，被指妨礙司法公正而遭到彈劾，但佢喺眾議院表決之前就宣布辭職，彈劾程序亦因而中止。

圖為詹森、尼克遜及克林頓，取自網絡。