早排翻睇鄭秀文、梅艷芳同張柏芝主演嘅電影《鍾無艷》，入面嗰句「有事鍾無艷，無事夏迎春」大家可以話係熟過教科書。其實鍾無艷係歷史上著名嘅醜女，去到40歲依然未嫁人，最終成為齊宣王嘅王后。搞笑嘅係，原來佢第一次見齊宣王嗰時示範咗個絕技，搞到齊宣王O曬嘴。究竟係咩絕招？隱身術。

歷史上嘅鍾無艷外貌到底係點？《列女傳》記載，鍾無艷膚色較黑，體型粗壯大大隻隻咁；樣貌方面，佢頭頂同對眼都比較凹，鼻孔朝外，頭髮稀疏，仲駝背添。

雖然鍾無艷嘅外貌麻麻地，但好食腦。話說佢見到齊宣王，就叫齊宣王娶佢。齊宣王梗係嚇親，問鍾無艷到底有咩才能，值得成為王后？鍾無艷就話自己識隱身，跟手成個人唔見咗（嗱嗱嗱有懷疑自己問《列女傳》），搞到齊宣王對佢好有興趣。

隔咗一日，齊宣王再次見鍾無艷，鍾無艷講出終極目的——勸諫。佢直言齊國對外要面對秦楚強敵，對內宣王又揮霍兼花天酒地，仲貪戀美色，無教好仔仔之餘又唔立太子，加埋奸臣當道，話齊國遲早滅亡。被鬧完一大餐，齊宣王乖乖地修心養性，無再貪戀歌舞表演同女伶，仲立咗太子，更將鍾無艷尊為王后。醜女大變身，全靠有智慧。

原圖嚟自網絡。