被喻為晚清四大名臣之一嘅張之洞面對當時積弱嘅國力，曾經提出「為了自救、自強，必須變法」，並倡議「中學為體，西學為用」，成為洋務運動嘅重要主張。喺辛亥革命爆發之後，張之洞等晚清重臣仍然受到世人尊重，其中孫中山就曾經稱讚張之洞係「不言革命之大革命家」，認為張之洞喺湖北興實業、練新軍、辦教育嘅舉動，為革命奠定基礎。

張之洞生於道光年間，1863年中一甲第三名進士，成為探花，從此步入政壇。中法戰爭嘅時候，張之洞出任兩廣總督，期間任用名將馮子材擊敗法國軍隊，又設置水陸師學堂、槍炮廠等等，令張之洞聲名大噪。到咗甲午戰爭慘敗俾日本之後，興起一系列嘅維新運動，張之洞提倡變法，但同時憂慮維新會導致固有國家政體、社會結構、倫常規範會崩解，佢撰寫咗《勸學篇》，提到「中學為體，西學為用」呢個觀點，又主張修改舊律、制定新法，彌補傳統政法制度嘅缺憾。

張之洞任內於廣東籌建水師，參與創辦軍工廠。光緒十三年，張之洞眼見西班牙、墨西哥、美國只供遠東流通嘅銀元不斷流入，於是奏請設立廣州機器鑄幣廠，寫下近代貨幣歷史嘅重要一頁。

原圖嚟自網絡。