上次講咗明末三大懸案之中嘅「梃擊案」，今次就講吓另一單懸案「紅丸案」。喺明神宗年間發生嘅「梃擊案」中，薊州男子張差闖入太子朱常洛居住嘅慈慶宮，被侍衛制伏，之後張差供出神宗寵妃鄭貴妃手下太監，令當時嘅大臣都認為係鄭貴妃主謀。當時鄭貴妃堅決否認，案件不了了之，後來神宗逝世，朱常洛繼位，但估唔到呢為明光宗登位1個月就因為「紅丸案」駕崩，而鄭貴妃亦再次牽涉其中。

喺朱常洛即位之後，鄭貴妃為咗取悅呢位皇帝，就獻上8名美女，此後朱常洛縱情聲色、體力透支，搞到身體好虛弱。呢個時候，原本係鄭貴妃宮中內醫、掌管御藥房嘅崔文升診治朱常洛，開咗啲去熱通利嘅藥，而唔係固本培元嘅藥，搞到朱常洛屙到七彩。後來另一位官員、鴻臚寺丞李可灼聲稱有仙丹妙藥可以醫到皇帝，朱常洛食咗一粒之後效果幾好，但點知食完第二粒之後就駕崩。當時一班大臣將事件同「梃擊案」聯繫起嚟，認為鄭貴妃同內醫夾埋謀害皇帝，係背後策劃嘅元兇，不過苦無證據，同件案有關嘅崔文升同李可灼最終分別被充軍同貶放。而因為朱常洛食嘅「仙丹」係紅色，所以呢宗案件就稱之為「紅丸案」喇。

原圖取自網絡。