過去嘅幾日假期香港爆發衝突，唔少街道嘅商店同大商場落曬閘，市面非常冷清。阿史諗起以前沙士嗰陣同樣都經歷過百業蕭條嘅境況，當年樓價插水式下跌，較97年高位下跌超過7成，疫症重災區嘅淘大花園有371平方呎嘅單位成交價低至55萬元，呎價只有1482元。當時唔少業主因為咁而變成負資產，宗數有成10.5萬宗，有負資產業主上街遊行，希望銀行放生或者政府打救，亦不時出現有人因為經濟困境而燒炭、跳樓等輕生嘅報道，令人心痛。

望返數據，當年可以話係每五個供樓嘅香港市民入面，就有一個負資產，未償還嘅貸款涉及金額超過1650億。除咗淘大，有發展商當年以1998蚊呎價推售將軍澳廣場；海怡1100呎嘅海景單位，開價300萬都無人買，就知道經濟同樓市有幾嚴峻。

為咗買樓，唔少人傾盡積蓄。負資產其實係指物業資不抵債嘅情況，業主可以話係血本無歸。喺2003年5月底，將軍澳一間學校嘅譚校長喺校內上吊自殺，旁邊仲有一包炭。譚校長生前月入超過8萬，但佢持有嘅多個物業因為沙士變成負資產，懷疑因供樓開支太大造成財政壓力，諗唔開而自尋短見。另外有貨櫃車司機借錢購買二手貨櫃車、成為車主之後，唔好彩撞正沙士，導致生意慘淡，無能力還債，結果2003年10月喺貨櫃裡面吊頸自殺，終年41歲。其實計阿史話齋，錢財都係身外物，珍惜生命最重要。

原圖取自網絡。