慈禧太后身邊有個好得寵嘅太監李蓮英，盛寵超過半世紀，想知佢點解咁得慈禧歡心？除咗要識擦鞋、審時度勢，適當嘅苦肉計都好重要。據慈禧御用嘅翻譯女官裕德齡所著嘅《清宮二年記》所載，有一次慈禧喺度瞓晏覺，突然聽到一陣好似爆竹炸裂嘅聲，由於宮裡嚴禁帶爆竹，呢種聲響顯得好唔尋常。一時間唔單止慈禧醒咗，成個宮殿嘅太監都嚇到周圍亂跑，連慈禧嘅說話都唔聽，好似癲咗咁。慈禧好嬲，於是叫人拎竹鞭出嚟打啲太監，叫佢哋安靜，但效果甚微。

突然之間，太監全部安靜落嚟，原嚟係李蓮英嚟咗，佢查明響聲原因之後向太后報告，事情係咁的：有個太監捉到隻烏鴉（據講太監好憎烏鴉，除咗因為烏鴉喺中國被譽為不詳之鳥外，仲因為大眾討厭太監就好似討厭烏鴉咁，甚至會叫太監做烏鴉。）於是呢個太監就將爆竹綁喺烏鴉身上，等烏鴉飛上天之後被炸到粉身碎骨。

點知好衰唔衰，隻烏鴉啱啱喺經過慈禧宮殿外面先被炸死，嚇親慈禧。慈禧聽完梗係嬲爆，要重重處罰個肇事太監。李蓮英即刻叫人撳住肇事太監落地下，打到一百下先叫停。之後李蓮英速速跪低兼叩頭，話自己管教無方，請慈禧責罰，慈禧梗係唔忍心罰佢，叫佢起身。李蓮英咁識做，難怪盛寵不衰喇。

圖為慈禧同李蓮英相，原圖嚟自網絡。