一代喜劇大師差利卓別靈自從1914年踏足電影圈之後就紅遍全球，吸引唔少人模仿卓別靈。翌年美國更掀起一股「卓別靈熱潮」，各種模仿卓別靈嘅比賽周圍都有。傳聞差利本人亦有參加過呢類型模仿賽，唔好以為自己模仿自己就實食無黐牙，差利無贏不突止，仲輸得好慘添。

據講有日差利喺美國嘅遊樂場遇到一場模仿大賽，主題係模仿差利行路。差利覺得呢個簡直就係easy job，於是用假名報名參加咗比賽，但就無戴招牌鬍鬚、著靴演出。結果出乎意料咁輸咗，仲要排到去廿幾名。呢個故事喺1920年新西蘭、1921年澳洲嘅報紙上都有出現過，但好多人都覺得係假嘅。無論係真定假都好喇，本人扮返自己有時都未必似嘅，畢竟最難突破自己嘅咪就係自己囉。

圖為卓別靈模仿大賽，原圖嚟自網絡。