宋徽宗趙佶做皇帝真係無乜建樹，不過講起藝術，佢又真係幾乎瓣瓣掂，書法、詩詞、畫畫，連品茶都識。難怪連修編《宋史》嘅元朝重臣脫脫都要概歎一句：「宋徽宗諸事皆能，獨不能為君耳！」話說宋徽宗曾經將繪畫列入科舉，仲親自出題考核過考生，想知咩畫可以入到皇帝法眼？繼續睇落去就知。

有一次，宮中選拔畫師，宋徽宗心血來潮要親自出題，一出就考起一眾考生。個題目係「山中藏古寺」，啲考生一係就只畫到深山密林裡面嘅寺廟，好少少嘅就畫到被好多樹木或山石遮住嘅古寺，但宋徽宗都唔滿意。直至佢見到一幅畫住一個和尚正彎腰用水桶喺山腳嘅小溪裝水嘅畫，畫面所見嘅背景係峰巒疊嶂嘅大山，山上古木參天，一條崎嶇小徑由山腳延伸向大山深處。而和尚裝水個水桶仲未完全離開水面，擔水嘅扁擔上仲模糊寫住「大唐天寶X年製XX寺」幾個字。

就係呢幅畫，令宋徽宗讚不絕口，仲話佢構思新穎，只見和尚不見寺廟，可知寺廟一定藏喺深山入面。而最妙嘅係畫上嘅扁擔，巧妙咁指出寺廟嘅古老，完全符合「山中藏古寺」嘅意境。而宋徽宗對意境嘅著重，亦促進咗中國畫嘅發展。

原圖嚟自網絡。