上次講起港督葛量洪在任期間，興建徙置大廈、學校同醫院等等政績，但要數具爭議嘅政策，就不得不提擱置「楊慕琦計劃」。前港督楊慕琦1941年12月向日軍投降，代表香港正式淪陷。佢之後淪為戰俘，直至日軍投降後先復任港督。楊慕琦曾經認為香港第時可以成為英聯邦成員之一，為咗等香港市民日後繼續願意接受英國統治，於是推出「楊慕琦計劃」，令香港人有更多機會參與政治。

「楊慕琦計劃」包括建議成立市議會，負責香港消防、城市發展、衛生等日常事務。市議會入面，三分二議席由民選產生，其餘議席就係由委任產生，華洋各佔一半。另外楊慕琦又計劃改革立法局，增加非官守議員同華人議席。

不過，楊慕琦响1947年退休之後，情況就唔同晒。當時接替楊慕琦出任港督嘅葛量洪，認為香港同其他英國殖民地唔同，新界係租借嘅土地，最後都要喺1997年交還俾中國，香港永遠唔可能獨立，一係繼續係英國殖民地，一係就被中國收返，成為廣東省一部分，所以無必要實行「楊慕琦計劃」。當時英國外交部亦憂慮「楊慕琦計劃」會激嬲中國，所以都反對計劃。同時，國共內戰期間有大批難民湧入香港，佢哋關心生計多於政制改革，最終英國政府响1952年以時機不合為由，取消「楊慕琦計劃」。

圖為葛量洪、楊慕琦，取自網絡。