近排搭港鐵，不時都聽到廣播話有輕鐵站受破壞而暫停服務，阿史諗起以前去屯門搵朋友嗰陣都搭過吓輕鐵，感覺幾新鮮。輕鐵有幾十年歷史，唔講唔知，原來初時電車公司有諗過營運輕鐵，仲構思過好似港島咁行雙層電車添。

話說早喺70年代，政府計劃發展屯門新市鎮嘅時候，就已經預留地方喺區內興建輕軌鐵路系統。據講個idea係用英國倫敦小區之間嘅輕軌鐵路作為參考，當時運輸司施恪（Alan Scott）就希望將類似系統套用到元朗同屯門兩個新市鎮。喺80年代初，當時九龍倉旗下嘅香港電車公司有意經營呢條新鐵路，仲諗住以港島區雙層電車方式運行呢條鐵路，九倉就開始同政府商討合作條件，但最後都傾唔成，結果政府就喺1983年尾搵咗九廣鐵路公司興建同營運輕鐵。

輕鐵最後喺1985年11月動工興建，而第一批輕鐵列車亦喺1987年運嚟香港。輕鐵原先諗住喺1988年8月8日啟用，但點知發生意外，推遲一個月通車。至今輕鐵路線總長約36公里、合共68個車站，每日載客約50萬人次。輕鐵响2007年隨住兩鐵合併，由港鐵接管。

原圖取自網絡。