前排同舊同學食飯，講到其中一個男同學自從結婚之後甚少出嚟聚舊，個個都嘲笑佢怕老婆、係老婆奴。其實怕老婆都唔係現代人嘅專利，連明朝抗倭名將戚繼光都好懼內。講起戚繼光夫人王氏就犀利囉，將門之後嘅佢唔單止經常同戚繼光出征，仲屢立戰功添。

有一次，戚繼光率領部隊出城抗敵，點知倭寇就避開戚繼光，轉而包圍戚家軍嘅家屬所在。就喺呢個時候，王氏即刻說服士兵打開兵器庫，叫家眷通通著上戚家軍嘅衫，企喺城牆上。啲倭寇遠遠一睇，以為係戚繼光留低嘅精兵，唔敢貿然行動，就係咁，王氏憑一招空城計就嚇走咗倭寇。

戚繼光同王氏成親多年，一直生唔到仔，戚繼光又怕老婆，唔敢名正言順咁納妾，唯有偷偷地喺出面娶咗幾名妾侍，生咗五個仔繼後香燈。不過，最終都係被王氏發現，嬲到揸住把刀喺房度等戚繼光返嚟，戚繼光嚇到要著晒盔甲先敢入屋。最後戚繼光要將妾侍嘅仔過繼去王氏名下先收到科，但從此夫妻間嘅感情亦留有裂痕。直至過繼嘅仔早逝，王氏心灰意冷，帶住自己嘅財產離開咗戚繼光，主動「休夫」。

圖為戚繼光夫婦劇照，原圖嚟自網絡。