古代唔少皇帝追求長生不老，好沉醉於煉丹升天之術，所以道士、方士喺當時嘅地位相當之高。明世宗朱厚熜，亦即係嘉靖帝就係其中一個沉迷升仙嘅皇帝，令被列為《明史》六大奸臣之一嘅嚴嵩得以把持朝政，惹嚟其他百官不滿，但就敢怒不敢言。反而係一個叫藍道行嘅道士，通過扮鬼扮馬，令嘉靖輕易咁處置咗嚴嵩。

話說藍道行因為精於扶乩（作法令神明附身）而得到嘉靖寵信，佢睇唔慣嚴嵩嘅所作所為，於是發動「特殊技能」——扮有神明附體，向嘉靖訴說嚴嵩嘅惡行。不過嘉靖反問，嚴嵩咁衰，點解神明唔懲罰佢？藍道行就話，要留返皇帝你自己處置。後嚟有御史上奏彈劾嚴嵩，嘉靖諗起「神明」嘅說話，最後真係流放咗嚴嵩。咁多人冒死進諫，都唔及藍道行扮神仙講嘅一番話嚟得直接有用，可見宗教信仰嘅力量之大。

圖為嘉靖同嚴嵩，原圖嚟自網絡。