埃及法老王嘅木乃伊我哋就聽得多，但中國皇帝嘅「木乃伊」大家又有無聽過呢？唔係講笑，歷史上真係有個皇帝被人挖空內臟，用鹽腌成「木乃伊」，佢就係遼國第二任皇帝耶律德光。

耶律德光即位做咗皇帝之後，就喺中原返回遼國都城嘅途中患上熱疾病逝。不過，耶律德光嘅媽媽述律太后就話「生要見人，死要見屍」，堅持要親眼見到耶律德光。但當時嘅天氣炎熱，屍體擺一日就已經開始腐壞發臭，又點能夠保存到咁耐呢？於是，有個廚師諗到個辦法，就係將耶律德光整成「羓」運返去。所謂「羓」，即係臘肉，遊牧民族鍾意食牛肉、羊肉，但好多時都食唔晒，為咗可以令啲肉可以保存得耐啲，佢哋就會將牲畜嘅內臟掏空，加啲鹽搓搓，呢啲就係羓喇。

雖然將堂堂皇帝當食物咁處理有啲大不敬，但一班隨行大臣商量之後，再諗唔到其他更好嘅辦法，唯有採納廚師嘅建議。最後，耶律德光被整成「帝羓」，成為中國第一個亦係唯一一個「木乃伊」皇帝。

圖為耶律德光畫像，原圖嚟自網絡。