駐港部隊上週六自發在九龍塘軍營外清理路障，受到唔少香港市民嘅稱讚，睇住新聞畫面，亦都令阿史諗起一段關於上海「南京路上好八連」嘅事蹟。

「南京路上好八連」現為第72集團軍某旅8連，前身係1947年8月喺山東由幾十個膠東農民子弟組成嘅一支連隊，後來改編為八連。1949年6月，當時解放戰爭打完，八連隨大部隊進駐上海，奉命喺上海南京路一帶執行巡邏、保衛任務。

上海南京路素有「十里洋場」之稱，燈紅酒綠、歌舞昇平，而解放之初，一啲潛伏嘅國民黨特務更採用「腐蝕、拉攏」嘅策略實行騷擾，並預言「上海是個大染缸，共產黨解放軍紅的進來，不出3個月，就要黑的出去」。當時，八連嘅幹部亦發覺，部分連隊戰士或多或少有啲受到不良風氣嘅影響，於是就開展咗一系列嘅教育活動，提倡艱苦樸素、克己奉公嘅精神。之後，連隊官兵們開始自製針線包，自己縫衣補衫，又步行到十幾里外嘅市郊開荒種菜，開展節約一粒米、一滴水、一度電等競賽活動。就係咁日復一日、年復一年，成個連隊錘鍊出「拒腐蝕，永不沾」嘅作風，並且作為連隊嘅優良傳統一直傳承到依家。

1963年4月，國防部頒佈命令授予上海警備區某團八連「南京路上好八連」榮譽稱號；同年8月，毛澤東仲揮筆為八連寫咗一首《八連頌》嘅詩。之後從1992年起，八連官兵開始資助山東沂水縣家境貧困的少年兒童完成學業；2008年，上海受到雪災侵襲，大量旅客滯留火車站，八連嘅官兵趕到車站清理積雪，又協助鐵路部門人員維持秩序，為旅客提供食物同飲用水。

原圖取自網絡。