今年嘅諾貝爾獎上個月就已經頒發完畢，不過，唔知大家有無諗過，點解諾貝爾獎頒咗咁多年，又無注資嘅情況下，啲獎金依然未派完？當然係因為諾貝爾基金生財有道喇。

諾貝爾獎係由瑞典化學家諾貝爾生前訂立嘅遺囑而嚟，諾貝爾將佢留喺世上嘅巨額遺產設立咗一個獎勵基金，由1901年開始，用嚟獎勵嗰啲上一年對人類有最大貢獻嘅人。最初諾貝爾嘅遺產雖然有3100萬瑞士法郎咁多，但頒咗成100幾年，如果無收入，早就應該派晒。但呢筆基金唔單止無減少，仲增值咗92倍，咁就要多得一班理財專家嘅努力。諾貝爾基金成立以嚟，投資過國債、房地產同股市等，喺利滾利嘅基礎上維持派發獎金。

當然，投資有風險，諾貝爾基金嘅投資並唔係次次都咁順風順水，尤其喺全球經濟唔好嘅年份，更加蝕到入肉。喺2011年，全球股票市場不振，諾貝爾基金蝕咗成1900幾萬瑞士法郎，搞到獎金大縮水，由原先嘅1000萬瑞士法郎縮到得返800萬。

至於諾貝爾基金當初點樣成立，又遇到啲咩阻滯？下次再講。

原圖嚟自網絡。