上個禮拜五，日本前首相中曾根康弘逝世，終年101歲。中曾根康弘喺1982年至1987年間出任日本首相，係日本二戰後任期第五長嘅首相。講到二戰，就不得不提中曾根康弘同台灣、美國嘅關係。

話說中曾根康弘曾經喺二戰期間服兵役，仲出任過海軍軍官，駐守過台灣高雄嘅左營海軍基地添。二戰日本戰敗後，中曾根康弘入咗東京警視廳； 1947年佢首度當選日本國會眾議員，此後就一直連選、做咗成56年議員。

值得一提嘅係，中曾根康弘喺從政初期仲譴責美國喺1945至1952年間佔領日本。轉過頭，當佢出任首相之後，對美國嘅態度就嚟咗個180度大反轉，唔單止同前美國總統列根老友鬼鬼，仲話如果美國同蘇聯開戰，日本將成為美軍「不會沉沒的航空母艦」，協助美軍封鎖蘇聯。

至於中曾根喺中日關係方面嘅功過，就各有分說。中曾根任內曾兩度訪華，與時任中共總書記胡耀邦交好，締造中日關係「蜜月期」；但喺1985年日本戰敗40周年時，佢公開以首相身分參拜供奉日本甲級戰犯嘅靖國神社，成為戰後第一個前往參拜嘅在任首相，喺當時引發軒然大波；2013年中曾根曾表示，日本應該對戰爭進行反省；到咗2015年，佢發表文章稱「日本過去發動的戰爭是一場侵略戰爭，也是一場錯誤的戰爭」。中曾根康弘逝世之後，中國外交部發言人回應對佢嘅評價時，表示讚揚佢為推動中日關係發展作出重要貢獻。

原圖嚟自網絡。