以前睇笑片《唐伯虎點秋香》，最深刻就係戲入面有好多通俗鬼馬嘅「打油詩」，為觀眾帶嚟唔少歡樂。不過「打油詩」呢種文學體裁，到底係點嚟嘅呢？同「打油」有咩關係？今次就同大家介紹吓。

關於打油詩由來，最常見嘅一種說法係，原來喺唐代南陽，有位書生綽號張打油，佢生性幽默，未曾考獲功名，平時就鍾意周圍閒逛、自得其樂，又鍾意作吓順口溜詩。有次佢閒逛嘅時候，就作咗首《咏雪》：「江上一籠統，井上黑窟窿。黃狗身上白，白狗身上腫」，結果一鳴驚人。

有一次，張打油行經一個新落成嘅縣衙，見到入面無人，就走入去參觀，臨走嘅時候詩興大發，就喺牆上留咗首詩：「六出九天雪飄飄，恰似玉女下瓊瑤。有朝一日天晴了，使掃帚的使掃帚，使鍬的使鍬」，縣令見到之後好嬲，就拉咗張打油，又命令佢作多首詩。咁啱當時叛軍安祿山被困南陽，張打油就以此為題，作咗首詩：「百萬賊兵困南陽，也無援救也無糧。有朝一日城破了，哭爹的哭爹，哭娘的哭娘」。縣令聽到之後覺得好有趣，就破例放咗張打油，而張打油嘅事跡就開始傳揚開去，後來啲人就將呢啲以俚語俗句寫成、不符格律嘅詩，稱之為「打油詩」喇。

圖片嚟自網絡。