今晚係平安夜，早喺半個月前好多商場就已經擺晒聖誕樹出嚟，裝飾得靚一靚。唔知大家有無留意，點解通常聖誕樹嘅樹頂都會擺一粒最大、最靚嘅星星？原嚟呢粒星係有名堂㗎，佢叫做伯利恒之星，佢嘅出現同耶穌誕生有關。

根據聖經記載，耶穌誕生之後，天空上就出現一粒好特別嘅星星，有三位嚟自東方嘅智者，即刻知道呢粒星星與別不同，認為呢粒星星嘅出現同一位救世主誕生有關，於是帶住禮物，跟住呢粒星星嚟到耶穌出生地伯利恆。而呢粒星後來就被稱為伯利恆之星，又叫耶穌之星，所以宜家好多聖誕樹上面都會擺一粒伯利恒之星，以慶祝、紀念耶穌誕生。

原圖嚟自香港旅遊發展局。