長洲太平清醮原來係咁嚟？

由於新冠肺炎疫情仍然持續，早幾日長洲太平清醮值理會就宣佈調整今年長洲太平清醮活動，原定嘅農曆四月初八日嘅會景巡遊繼續舉行，但最多人關注嘅飄色巡遊就會取消。至於午夜搶包山比賽亦都唔會舉辦，係繼1978年5月發生包山倒塌事故、2005年復辦之後，第二次取消呢項活動。。

長洲太平清醮曾經就被美國《時代週刊》，列為「全球十大古怪節日」之一，同時又係第三批中國國家級非物質文化遺產。講返呢個節日嘅起源，坊間就流傳兩個講法：第一個就係指太平清醮起源於清朝中葉時，相傳當年長洲島上就發生過瘟疫，唔少居民都因為咁而失去生命，於是後來就有居民到長洲北帝廟舉行醮會，而且齋戒三天以示尊敬，疫病先得以消退。

至於第二個講法，就係話呢個習俗原來係來自太干山街，因為當年就爆發過鼠疫，有一位海陸豐居民就將自己屋企供奉嘅北帝放到街上，畀大家一齊上香祈福，冇幾耐疫情就消失咗。而呢個做法當時周圍流傳，隨住海陸豐嘅居民移居到長洲，仲成為埋當地嘅傳統節日。