上世紀有對情侶喺長城兩邊步行90日 原來係為咗分手？

早幾日係世界知名嘅行為藝術家烏雷（Frank Uwe Laysiepen）逝世嘅日子，終年76歲。熟悉行為藝術嘅史友都知道，提起烏雷自然就會聯繫埋佢嘅前拍檔兼前情人瑪麗娜·阿布拉莫維奇（Marina Abramović）。

佢哋自1976年起開始合作，其間有過唔少精彩嘅行為藝術作品，專門係探究情人之間嘅信任同傷害，就好似1977 、 1978 年嘅《Breathing in/breathing out》，兩位藝術家相吻長達19分鐘，期間只係靠對方呼出嘅氣維持，最後雙雙缺氧倒地；而1977年嘅《Relation in Time》同樣經典，就係佢哋兩位將頭髮緊綁埋一齊，背對背坐足17個鐘。

而令阿史最印象深刻，就係佢哋喺長城舉行嘅一次《The Lovers–The Great Wall Walk》（愛人─長城行）。兩位藝術家喺1988年分別去到長城嘅東西兩邊，烏西就喺甘肅省嘉峪關出發，至於阿布拉莫維奇就由河北山海關出發，佢哋行足90日，最後就喺二郎山相見，互相擁抱之後就告別，結束呢段12年嘅愛情。