早幾日就同大家介紹過香港第一個水塘薄扶林水塘，而同樣喺薄扶林，曾經就有一個號稱係戰前亞洲最大型嘅牧場建築群，入面養住嘅係大批專門用嚟生產新鮮牛奶嘅乳牛，到底呢個牧場係點嚟嘅呢？

喺1886年，有一位叫做孟生（Patrick Manson）嘅蘇格蘭外科醫生，喺為病人診症嘅期間發現唔少香港人對牛奶嘅營養價值都唔多認識，加上香港亦都冇乜新鮮嘅牛奶，於是佢就決定聯同香港嘅五個商人包括遮打爵士同埋明德醫院創辦人Granville Sharp等，一齊建立牛奶公司牧場，經過一輪嘅選址，就發現薄扶林嘅後山、置富山谷係一個好地方，既有水源又可以種植牧草。當年佢哋就斥資3萬蚊買入地皮，仲喺英國買嚟50隻乳牛，真係相當大嘅投資

牧場慢慢發展，為唔少居港嘅外國人同埋華人提供新鮮嘅奶源，增強免疫力。而去到1930年代，就係呢個牧場全盛嘅時期，曾經有過1500隻乳牛，成村薄扶林村嘅居民都係以呢類型嘅生產工作為生。而慢慢去到70年代，牛奶牧場嘅生意就開始衰退，再加上類近嘅地產商收購，1972年11月29日牛奶公司終於被收購，牧場喺1983年關閉，66個同舊牛奶公司遺址有關嘅建築就遺留至今。

原圖嚟自網絡