話說阿史尋日就去咗沙田，因為清明節嘅關係都有唔少孝子賢孫上寶福山拜祭祖先，而喺寶福山旁邊就有一座萬佛寺建築群，秘書見到之後就即時問咗一個好有意思嘅問題：到底萬佛寺係咪真係有萬尊佛像呢？阿史今次就嚟答一答啦！

萬佛寺位處沙田排頭村嘅萬佛山上面，係由月溪法師喺1938年游化香港期間籌備興建，喺1949年動工建設，歷時8年後嘅1957年建成。而喺決定興建萬佛寺嘅時候，月溪法師就得到南洋兄弟菸草公司簡玉階將一塊「晦思園」嘅土地捐贈畀佢，所以當年佢對起廟呢件事完全親力親為，由擔鐵運石去到塑造佛像都有親身參與。

建成後嘅萬佛寺因為係依山而建，按照山勢就分成兩組唔同嘅建築，而合共就有5間佛殿，4個亭閣、一條走廊同埋佛塔，供奉住釋迦牟尼佛、觀音、地藏菩薩等。心水清嘅史友應該都會認得，喺山上嘅九層佛塔，其實就係當年匯豐銀行100蚊嘅圖案。

嚟到秘書問嘅問題，到底萬佛寺係咪真係有萬佛呢？原來呢個數字並唔係一個虛數，由山路兩邊嘅500羅漢，去到殿內大小佛像，一共有一萬二千八百幾尊佛像，名乎其實係「萬佛寺」。

原圖嚟自網絡